అనేక అంశాలకు సంబంధించి బస్తర్ ప్రాంత మావోయిస్టు నక్సలైట్లు ఎప్పటికప్పుడు తమ వీడియోలను వైరల్ గా ఉంచుతారనే ప్రచారం ఉంది. గతంలో పలు అంశాలకు సంబంధించి మావోయిస్టు నక్సలైట్లు ఇటువంటి అనేక వీడియోలను వైరల్ చేసిన ఉదంతాలు ఉన్నాయి. తాజాగా నక్సలైట్లకు సంబంధించి అటువంటి వీడియో ఒకటి వైరల్ గా మారడమే అసలు విశేషం.
దక్షిణ బస్తర్ లోని సుక్మా, బీజాపూర్ (తెలంగాణా సరిహద్దు) జిల్లాల ప్రాంతాల్లో తమ కార్యకలాపాలు నిర్వహించే మావోయిస్టు నక్సలైట్లకు చెందిన ‘డాన్స్’ వీడియో ఒకటి వైరల్ గా మారింది. ఆయుధాలు ధరించిన నక్సలైట్లు వాయిద్యాలను మోగిస్తూ మాంచి హుషారుగా డాన్స్ చేస్తున్న వీడియోను దిగువన మీరూ చూడవచ్చు. నక్సల్స్ డాన్స్ చేస్తున్న వీడియోలో గ్రామస్తులు కూడా పెద్ద ఎత్తున ఉండడం గమనార్హం.
ఈ ఘటన గురించి బస్తర్ ఐజీ ఛత్తీస్ గఢ్ మీడియాతో మాట్లాడుతూ, బహుషా మే, జూన్ నెలల్లో చిత్రీకరించిన వీడియోగా అంచనా వేశారు. ఏదేని పండుగను జరుపుకున్న సందర్భంగా గ్రామస్తులు కూడా వేడుకను చూడడానికి హాజరై ఉంటారని చెప్పారు.
ఈ వీడియో ఎప్పటిదనే అంశంగా స్పష్టంగా తెలియకపోయినా, నక్సలైట్ల డాన్సులు, పాటలు మాత్రం స్పష్టంగానే ఉండడం గమనార్హం. ఆయుధాలు ధరించిన మావోయిస్టు నక్సల్స్ ను ఈ వీడియోలో స్పష్టంగా చూడవచ్చు.