మావోయిస్టు నక్సలైట్ల మందుపాతర గురి తప్పింది. పోలీసుల వాహనంగా భ్రమించి పేల్చిన ఓ మందుపాతర వల్ల సామాన్యులు ప్రయాణిస్తున్న సుమో వాహనం గాల్లోకి లేచింది. కొద్దిసేపటి క్రితం జరిగిన ఈ ఘటనలో ఇద్దరు పౌరులు తీవ్రంగా గాయపడ్డారు. ఛత్తీస్ గఢ్ లోని బీజాపూర్ జిల్లా బాసగూడ-తారెం ప్రాంతంలోని రాజపేట సమీపాన నక్సలైట్లు ఈ చర్యకు పాల్పడ్డారు. మందుపాతర పేలిన ఉదంతంలో మహ్మద్ ఇక్బాల్, బలరామ్ ప్రధాన్ అనే వ్యక్తులు గాయపడగా, వారు ప్రయాణిస్తున్న వాహనం ధ్వంసమైంది. క్షతగాత్రులను చికిత్స కోసం తరలిస్తున్నామని బీజాపూర్ ఎస్పీ కమలోచన్ కశ్యప్ ప్రకటించారు.
