కోబ్రా డిప్యూటీ కమాండెంట్ సహా ముగ్గురు పోలీసులకు గాయాలు
నక్సలైట్లు అమర్చిన మందుపాతరలను నిర్వీర్యం చేస్తున్న క్రమంలో ముగ్గురు పోలీసులు తీవ్రంగా గాయపడ్డారు. పొరుగున గల ఛత్తీస్ గఢ్ లోని సుక్మా జిల్లా కిష్టారం పోలీస్ స్టేషన్ పరిధిలో ఆదివారం ఈ ఘటన చోటు చేసుకుంది.
పోలీసులు లక్ష్యంగా మావోయిస్టు నక్సలైట్లు పాతిన మందుపాతరలను నిర్వీర్యం చేస్తుండగా కోబ్రా విభాగానికి డిప్యూటీ కమాండెంట్ వికాస్ కుమార్ చేతులకు, కాళ్లకు తీవ్రంగా గాయాలయ్యాయి. ఇదే ఘటనలో మరో ఇద్దరు జవాన్లు కూడా గాయపడ్డారు. తీవ్రంగా గాయపడిన కోబ్రా డిప్యూటీ కమాండెంట్ కు స్థానికంగా ప్రాథమిక చికిత్స చేశారు. అనంతరం మెరుగైన చికిత్స కోసం హెలీకాప్టర్ లో రాయపూర్ కు తరలించారు.
ఇదిలా ఉండగా బీజాపూర్ జిల్లా కుట్రూ పోలీస్ పోలీస్ స్టేషన్ పరిధిలో నక్సలైట్లు వాహనాలకు నిప్పంటించారు. కేతుల్ నార్ వద్ద ప్రయివేట్ సంస్థ పనులు నిర్వహిస్తున్న జేసీబీ వాహనాన్ని మావోయిస్టులు నిప్పంటించి దహనం చేశారు. ఆయా ఘటనలను సుక్మా, బీజాపూర్ పోలీసు అధికారులు ధృవీకరించారు.