ఫొటోలో కనిపిస్తున్న ఈ అమ్మాయి ఎవరో తెలుసా? అచ్చ తెలంగాణా అమ్మాయి. ఉమ్మడి కరీంనగర్ జిల్లా మంథని మండలం గాజులపల్లె నివాసి ఆకుల చక్రపాణి దంపతుల కూతురు. మంథనిలో చదువుకున్న సోనియా బీటెక్ చదివింది. తెలంగాణ జాగృతిలో ప్రధాన భూమిక నిర్వహించింది. తెలంగాణ ఉద్యమ కారుడు వి. ప్రకాశ్ కు పీఏగా పని చేస్తూనే, మరోవైపు సినీ రంగంలోకి ప్రవేశించి తన అదృష్టాన్ని పరీక్షించుకుంది.
జార్జిరెడ్డి సినిమాలో హీరో చెల్లెలిగా నటించింది. తొలి సినిమా అవకాశంతో వెండి తెరపై మెరిసిన సోనియా ప్రముఖ దర్శకుడు రామ్ గోపాల్ వర్మ తీస్తున్న ‘దిశ’ సినిమా అడిషన్ ద్వారా హీరోయిన్ గా ఎంపికైంది. తమ ప్రాంతానికి చెందిన ఆకుల సోనియా ఆర్జీవీ తీస్తున్న సినిమాలో హీరోయిన్ గా నటిస్తుండడంతో వెండి తెరపై తమ ప్రాంతానికి చెందిన అమ్మాయికి అవకాశం దక్కిందని మంథని వాసులు మురిసిపోతున్నారు.